لغز أجودي / بقلمي (اخر مشاركة : أيوب البلاجي - عددالردود : 10 - عددالزوار : 55 )           »          فضل صيام يوم عاشورا (اخر مشاركة : أيوب البلاجي - عددالردود : 2 - عددالزوار : 9 )           »          النفـــس العزيزه.. (اخر مشاركة : عسومه الحربي - عددالردود : 2 - عددالزوار : 12 )           »          ::: (( وين اللحالي فاقده لي مده )) ::: (اخر مشاركة : عسومه الحربي - عددالردود : 6 - عددالزوار : 52 )           »          رجيم لنسف 6 كيلو من وزنك للدكتور بهاء ناجى (اخر مشاركة : غاوية كلام - عددالردود : 0 - عددالزوار : 6 )           »          تــــامر على شي؟.. (اخر مشاركة : عسومه الحربي - عددالردود : 2 - عددالزوار : 24 )           »          مطلوب مدرسين في معهد ndt .. الدمام (اخر مشاركة : عسومه الحربي - عددالردود : 0 - عددالزوار : 6 )           »          مطلوب مسؤولات بشركة عبداللطيف جميل .. (اخر مشاركة : عسومه الحربي - عددالردود : 0 - عددالزوار : 7 )           »          مطلوب مدربات بمعهد للتدريب والتأهيل..الرياض (اخر مشاركة : عسومه الحربي - عددالردود : 0 - عددالزوار : 4 )           »          إحــــذر تصك الباب.. (اخر مشاركة : عسومه الحربي - عددالردود : 0 - عددالزوار : 6 )           »         




العودة   مجالس حرب > مجلس الأدب الشعبي > جلسة إعلام الشعراء > دواوين الشعراء

الإهداءات
عسومه الحربي : اللهم إجعل هذا الصباح صباح خير.. لا يضيق لنا فيه صدر . ولا يخيب لنا فيه أمر . و إجعل لنا بكل خطوة توفيق و تيسير و أجر..آمين ..صباح الخير     عسومه الحربي : ألف شكر لمن أختارني العضو المميز بالمنتدى.. شاكرة لكم هالثقه وهالتقدير ويارب اكون عند حسن ظنكم بي دووم..أخجلتوني بذوووقكم لاخلا ولاعدم...~     عسومه الحربي : أخوي طلال الحازمي~ شاكرة لك هالترحيب وهالتقدير ولي الشرف إني أكون معكم بهالمنتدى الراقي فيكم ويوجودكم.. ويارب اكون عند حسن ظن الجميع ..تحياتي لك     عسومه الحربي : أخوي مزعم آلكمي.. اللهم آمين..و هلا بك أكثرررر مشكور على الترحيب و المنتدى منوور بوجودكم وبأهله ويارب اكون عند حسن الظن دوم ..     مزعم آلكمي : ::: (( عسومه الحربي اهلا بك في مجالس حرب منوره الله ينور قلبك بالايمان )) :::     عسومه الحربي : اللهم اجعلني شكوراً ، واجعلني صبوراً ، واجعلني في عيني صغيراً وفي أعين الناس كبيراً...صباح الخير على الجميع أدري نايمين وكذا إصحوا يالله بسكم نوووم     عسومه الحربي : اللَّهمّ اجْعَلْنِي خَيْرًا مِمَّا يَظُنُّونَ، وَاغْفِرْ لِي مَا لا يَعْلَمُونَ، وَلا تُؤَاخِذْنِي بِمَا يَقُولُونَ..     اصايل حرب : اللهُم اجعلنا من أهل النفوس الطاهرة . والقُلوب الشاكرة والوجوة المُستبشرة الباسمة . وارزقنا طيب المقام وحُسن الختام . صـــِبُأِحّ أَلـْورّد@>-- اللهم صلِ وسلم وبارك على نبينا محمد ……    

إضافة رد
 
LinkBack أدوات الموضوع
قديم 19-12-2005, 05:42AM   #1
العضوية الفضية
 
الصورة الرمزية محمد عبدالمحسن البدراني
 
تاريخ التسجيل: 05 2003
الدولة: الرياض
المشاركات: 1,263
ديوان الشاعر /عبدالله بن زويبن المعمري

أنا : محمد عبدالمحسن البدراني






سيرة الشاعر عبدالله بن زويبن( هو عبدالله بن زويبن بن بطي من المعامرة من بني عمر من حرب .. واحد من اهم شعراء المملكة ومنطقة الخليج ...

ورث الشعر من والده الشيخ زويبن بن بطي المعمري ( رحمه الله تعالى ) وصقل موهبته الشعرية من خلال مجالسته لكبار

الشعراء وهو لم يبلغ الخامسة عشر من عمره ... كتب بعض القصائد التي لم تر النور كماهو حال كثير من الشعراء الذين

يترددون في نشر قصائدهم الاولى ..

كتب في الحكمة فجاءت ابياته درر ذهبية ... وكتب في المدح فتباهى المستمعون قبل المعنيين بالامر ... كتب في الغزل

فتغنى العشاق بقصائده المليئة بأحاسيس المحب ..كتب في الرثاء فبكت الحروف قبل المدامع )


*تم جمع هذه القصائد بجهد من الشاعر منصور المعمري وله جزيل الشكر ...

*اولى قصائده التي أحببت ان اضعها بين يديكم قصيدة في الحكمة يسندها على ابنه بدر


ياعزوتي يابدر مااقرب حضايبك = على الخطا والصبح حبك نقازي
نوب تنسينا الشقا في عجايبك = ونوب تولعها بليفة وقازي
ادناة مايرضيك وأدناة مااغضبك = تلقط الغلطلت لقط الجهازي
ماهي عداوة يوم اطالبك واضربك = أنته حفيد جدودنا ماانت نازي
لاشك انا يابدر ابنصحك وادبك = واعطيك عن كل المعاني أجازي
تلقى فوايدها ليا خط شاربك = بها على كل الوصايا أمتيازي
خلك شمالي عند زلة قرايبك = وعلى الحقوق الليا نصنك حجازي
لاتذخر المذخور من دون واجبك = اوف الحقوق اللازمات بنجازي
للضيف والجيران ليّن جوانبك = وبالطيب جاز وبالردى لاتجازي
احلم على زل رفيقك وصاحبك = ادمح خطاهم لاتصير انتهازي
يابدر والله ماتخونك مناسبك = لك منسب طيب وساس عزازي
أفرح ليا قالوا هاك العود جاذبك = يصير عندي مفخرة واعتزازي


*وهذه قصيدة اخرى تعبر عن نفسها

الله من قلب الليا منه ادلج = لو هو بجو فيه للناس صجه
يدوي مثل مايدوي الطير بالعج = مع خايع مايندرى وين فجه
ماينتبه للي ينادي ليا سج = والليا انتبه كن الشباري تخجه
لابد من يوم به الهم يفرج = عن كل عين بالسهر مستلجه
الله على اللي تو رقمه يبرمج = ماصار فيه من المطانيج رجه
اسرع من الزورق الليا منه امرج = واسبق من اللي بالاشعه يوجه
جمس الليا قامت قزوزه تواهج = ضاعن عريضات الرفارف بعجه
من نقرة العارض يفج القور فج = ويخلي الشملول بين الاحجه
خدٍ تحت مزن بروقه تلاعج = نبته من الوسمي غصونه من اجه
لومابها الا الذيب والطير الابلج = ناخذ بها عن ضيقة الصدر سجه
عن مجمع به راعي الحق يفلج = بعض البشر فرقاااه عمره وحجه
العد تنفاه الضوامي الليا رج = والمر تنكاه الكبود وتزجه


*وهذه قصيدة مدح في الشيخ عامر ابن لويحق المطيري



الله على اللـي نازحـات المشاويـر= جـرد السهـال القاسيـة والرمالـي
يشوحهـا ويموحـهـا بالتياسـيـر = شوح الرشا المبـروم بيـن العيالـي
مـن جـم بيـر عمقـوه الحفافيـر =مسرمـدٍ تاريـخ عصـره هلالـي
عن ماه يقصر حد شـوف النواظيـر= قليـل واللـي مـن طـوال المدالـي
وردت عليه ضعون بدو ومضاهيـر= عطشـا ولا فوقـه مقـام ومحالـي
وتخالفت بيـن الرجـال الأشاويـر =أحـد يبـى الميـراد وأحـدً يبالـي
وقـامٍ يجـرن الحريـر الغنـاديـر =ويبيـن أطـراف رمـز الجمـالـي
وتجاوبن بالصوت ويـن المناعيـر= وقامـن يطشـن العبـي والشيالـي
وتـوارد وه أثنيـن فيهـم عياطيـر =من صوتهن جاهم طـرب وانفعالـي
وتلوه فـوق وطيـروا فيـه تطييـر =حرفيـن ذرفيـن نشاطـن عجالـي
جيـبٍ يعـدي نايفـات الحمـاريـر= بالعرض يبجدهـن ويطلـع عدالـي
من مصنع توريد ما هـو بتصديـر= إلى مضى من فـوق عمـر الليالـي
بديه آليـا شفتـه يصيبـك بتخديـر = وكشنه آليا شفته يجيـك أنداهـا لـي
مـن قبـل مطـور وزادوه تطويـر = لجـن الريـال يكـون المستحـالـي
فكسار له في كـل دولـه جماهيـر = ما فيه هرجه لا كـن السعـر غالـي
أبي آليا هاضت شجـون العصافيـر = وشـع الصبـاح وجالهـن أجتوالـي
طلبـت عـون الله والـي المقاديـر = ونحرتـه الصمـان ديـرة خوالـي
أهل بيوتن يـوم وقـت الخطاطيـر = يقلى بها الضيف القـرى والظلالـي
مثل الجبـال الشامخـات المقاطيـر = يامن بها اللي عـن عوانيـه جالـي
وعلى السبايـا ينطحـون المغاديـر = ويهاجمـون ويحتـمـون التـوالـي
قـومٍ آليـا كـرو وفـرو مدابـيـر = علـى المهـار مجـدلات الحبـالـي
ارقابهـن للخلـف مثـل البواكـيـر = أدبارهـم حرفـة وخطـة قتـالـي
ياما الحقن من قال تكفـون يامطيـر = لوإ ن لاصـوات الرصـاص شتعالـي
أيدينهـم تـورد شبـات البواتـيـر = ومتونهـم تدحـم ركـون الجبالـي
وعيونهم بالهوش توصف على الكير = لها بجمر السمـر مضـرب مثالـي
أن ساقـم العطفـة لقـومِ مناحـيـر = عقـب المعانـد واحتكـام الجدالـي
قدامهـم تصغـر كبـار الطوابيـر = ويصير فيهـا زعزعـه وانحلالـي
وأن جالهـم دون العوانـي مناويـر = يـدون حتـى بالرسـن والعقـالـي
أبـي خيـامٍ بالعـمـد والتيـازيـر = مبنيتـن للضيـوف سمـح القبالـي
مرفوعتٍ مثـل المـزون المزابيـر = ممسوستـن مفروشتـن بالـزاوالـي
مفتوحـتـن بيبانـهـا للمسايـيـر = وناره لها في كـل وقـت اشتعالـي
يردم عليهـا مـن كبـار الجثاميـر = سمر القرى ماهي مطـارق سيالـي
ونجرن آليا حرك تفجر تقـل زيـر = وبيـض غريـبٍ شكلهـن بالدلالـي
وحيلـن يقلطهـن كرامـه وتقديـر = لبعـد بعيـد وللقـريـب المـوالـي
الجـود وكـرام الوجيـة المسافيـر = طبع الرجال اللـي يبـون الكمالـي
ما يقبلون النقص والنقـص تقصيـر = لـو العفـون تسمـي المـر حالـي
الجود صار بـدار والبخـل توفيـر = علـى هدفهـم ركـبـوه احتيـالـي
المزن ما ينبـت زهـور ونواويـر = ولا يزي الضميان شـوف الخيالـي
ما ينبت المرعـى ولا ينفـع البيـر = أن كان ماصـب القـراح الزلالـي
الشيخ عامـر دون نقصـان بالغيـر = أبن لويحـق شيـخ شمـل الهجالـي
عند القبائل حجمه أكبـر مـن النيـر = والفعل هو مقيـاس حجـم الرجالـي
ذكره شهير مع الرجـال المشاهيـر = دايـم لذكـره بالمجالـس مجـالـي
وأخذت عنه مـن الشويـب تقاريـر = منيـف عنـه بكـل شـئٍ حكالـي
كنه يفرجنـي علـى فلـم تصويـر = يحيـر التفكيـر مـثـل الخيـالـي
من شأن ربعه ضخر الصعب تصخير = خلا الجبـال دروب مثـل السهالـي
الشامخـات اللـي بهـن للصقاقيـر = مصنع ولـع لكـن عسيـر المنالـي
شمـر وفجرهـن باللغـام تفجـيـر = من شأن تحقيـق الهـدف والامالـي
خطٍ تعاقب بـه ضخـام المواطيـر = أعـز مطلـب للبـلـد والأهـالـي
وبنى العماير باهضـات المخاسيـر = وراحن هدايـا مـا عقبهـن ريالـي
ومن يبذل المجهود في نيـت الخيـر = يلقـاه عنـد الله عزيـز الجـلالـي
تم الكـلام وكـل مـا قلـت تعبيـر = عن ما طرى لي بالبيـوت الجزالـي
غرايـبٍ مثـل الذهـب والدنانـيـر = مكانهن في مستـوى الشعـر عالـي
ون كان مـا قـرو لهـن الشواعيـر = من نضمهن ريحـت فكـري وبالـي


*وهذه قصيدة اخرى مليئة بالاوصاف الجميلة

سقوا سقى الله من مطر كل ناشي = ربعٍ لهم في منبت القفر مغباش
يتلون درب اللي لبرقه تواشي = كثحه على حد السما تقل لطاش
كم مرة بين السفر والغطاشي = دكوا على جول المها منه وأنحاش
وبنوا به اللي مثل روس الدشاشي = مثل القور ماهن هداريس وعشاش
لاشافها الجيعان جاك متحاشي = يقلط على بيض المناسف والاكباش
وصفر من الصالي لهن اجتواشي = يصوك ريح ابهارهن كل ماغاش
والتمر والمركا ودمث الفراشي = زل ٍ بروما له موزع ونقاش
ماحسبوا تال الشهر للمعاشي = ولاسعروا حمل البواخر على الطاش
بالسوق عملتهم ماغير المواشي = اللي من اللي ينبت الغيث تعتاش
وإن جاء بلدهم زاد ولا قماشي = وسمعوا ووافاهم بالاخبار طراش
ودوا لسوق البيع فاطر وحاشي = والمندرج بالسوق من باق الادباش
والطيب سعره صعب ماهوبلاشي = فازوبه اللي يدفعون الثمن كاش
ماجاب غيب قلوبهم كل واشي = بين القبايل ذكرهم يدهش ادهاش
مافض مجلسهم خطاة الدفاشي = اللي يتوع بكلمة تصطح الجاش
هماز لماز هبود ارياشي = سباب نمام مراوغ وهلاش
الليا نصحته زاد شره وطاشي = انحل امانه وانفرط تقل رشاش
ينبش جثث ناس بها الدود ماشي = وسط اللحود اللي توحش توحاش
حرااام فيها مايجوز النقاشي = جنايز حدر الثرى كيف تناش
كل العلوم الطيبة في تلاشي = تمضحلت واللي بقي ( طاش ماطاش)




*وهذه قصيدة اجتماعية يتحدث فيها عن موضوع معين في نفسه


لي حاجة عيت تحقق من العام = عيا يطيب الحظ لو قلت أظنه
يفز فزة غاتر عقب مانام = جنه حلوم مزعجه وأيقظنه
وجدي على تحقيقها وجد صدام = على يدين بالولاء بايعنه
وبلاده اللي ماعرضها للاسوام = وعرش الرئاسة والجيوش المرنه
اللي قذايفها تعدت ورى الشام = شامير يوم ولايته روعنه
وبيوته اللي من سيراميك ورخام = خطط وصممهن على كيف فنه
ماتنتعدد تكلفتهن بالارقام = ماهو مواطن عايدي يبهضنه
حاكم من الحكام ويصدر الخام = دار السرية والدول يدعمنه
متريّس له دولة شعبها اقسام = ويلعب على القسمين شيعه وسنه
مخلي ٍ شيخانهم تقل خدام = يمشون خلفه خوف ماهو محنه
ملا البيوت من الارامل والايتام = وملا السجون المظلمة والمجنه
يالين طشنه مقادير الايام = من النجوم النايفة نزلنه
مثل الوليشة بين عدوان الاسلام = من كل صوب كلابهم ينهشنه
او وجد عود يرتكي كل ماقام = على كفوف يديه من كبر سنه
الليا غفل بايامه الماضيه هام = والليا انتبه من غفلته ( جر ونّه )
من عقب ماهو للمغاوير مقدام = الليا غزا صم الرمك يتبعنه
ومروبع يزمي مثل عز لزام = الليا اقبلن شيب الغوارب نصنه
بظهورهن ربع كريمين وحشام = الليا جذبهم صوت نجر يدنه
يجذب له الغايب وسموه عزام = من كثر مايجذب شراريب بنه


اليوم كل اللي بقي جلد وعظام = والمال خمس اشياه والبيت عنه
ولاله عيال ينصرونه الليا انظام = الا بنات ٍ بالهضاااايب شونه
ياقلب خلك للروابع والاوهام = رفيق درب وكل هم ٍ تبنه
والا انتفض واربط محقاك بحزام = وعن قوم ( وش سويت ) خافيك كنه
والشر عنك خلاف والخير قدام = والصبر في وقت المعاناة سنه

*وهذه قصيدة غزلية

إن كان تنشد عن علومي وأنا صبي= ابتذكرها واعلمك عنها
لو هي بصفحات ٍ طواها الزمن طي= جرة مطر جاها عجاج ودفنها
ألعب طواريق الهوى مع هل الغي= اثقل المعنى واخفف لحنها
والشعر يبقى في قلوب العرب حي= ولا كل من سوى القصيدة تكنها
وأنا حداها حدي الاصعاب بعصي= واقودها قود الاديب برسنها
والحب مردوده على صاحبه سي= كم ضحكة ونَات قلبي ثمنها
أذكر سنة تسعه وتسعين هجري= الف وثلاثمية بداية زمنها
زلت بي الاقدام للشمس من فيَ= اقدار والاقدار تومر وتنهى ّّ
غافل وجتني من كوت خافقي كي= كية عطب لولا طبيب مكنها
أبعدت مضربها عن الصدر بيدي= ولدَت على كبدي برمح طعنها
وعرفت ماتخفيه في صدرها لي= من واقع النظرات مني ومنها
نظرت فيها مثل نظراتها في= وعجزت اقاومها وصديت عنها
كل النساء ظلماء وهي بينهن ضي= غطت شعاع الشمس أشعة بدنها
من الذهب تلبس خلاخيل وحلي= سود محاجرها وحمر وجنها
مدري تسمى من ومنين ومن أي= وش هي قبيلتها وموقع سكنها
راحت وانا مااعرف من اخبارها شي= الا رموز الموتر اللي حضنها
مدينة من بين ابو ظبي ودبي= لعلها كاننها هي وطنها
تمطر عليها السحب هذي ورى ذي= وديم الليا قفى تراها ودنها

*قصيدة الشاعر عبدالله بن زويبن مزاين 1425ه

راكب اللي والنجوم اللامعاتي = في سماهن والصباح يشع ضيه
بين حي الجامعة والمرسلاتي = واستدار امع الخطوط الدايرية
ما التفت راعيه يم اللافتاتي = حافظ كل الخطوط الريسية
أول أسمه بالثلاث المفرداتي = رقم خمسة بالحروف الأبجدية
تو لوحاته عليه مركباتي = صادرات من مرور الناصرية
وارد توه حديث مواصفاتي = يلتهب بديه ويلمع داخليه
كن طبلونه جهاز مراقباتي = في حدى المستشفيات المركزية
شاشة لنباتها مثل السفاتي = للدماغ مخصصة والباطنية
تنكشف به بالضروف الطارياتي = دقة القلب السريعة والبطية
وكشنه الداخل زلول ناعماتي = قبته وارضيته والجانبية
والمراتب من جلود الزاحفاتي = ماآدري هو جلد داب أو جلد حية
ماقطعت الشك مير مموهاتي = مثل تمويه البدال العسكرية
بديه أدهم والخطوط مذهباتي = مثل عقد الماس في عنق الفتية
والزوايا والركون مصفحاتي = مايله والواجهه مثل الخلية
بين شمعات صغار مربعاتي = والعلامة وردة في مزهرية
يوم مريت العيون الساهراتي = قوةٍ للأمن في حجم السرية
قبل ما آقف عندهم واطلع اثباتي = صفو العسكر ودقوا له تحية
مشترينه للديار النازحاتي = والخطوط المتعبات السرمدية
الطوال اللي تشق النايفاتي = باتلات مثل بطن البندقية
ماتخاويه الرياح الذارياتي = والوحش والطايرات المروحية
كن له جنحان مثل الطايراتي = يرفعنه فوق مدري جاذبية
وكن ماله من خلاف مساعداتي = قوة الماطور ترفع مقدمية
وان عطيت ابه الفجوج الخالياتي = فزته تعطيك عزم ومعنوية
ماوقف يطبخ بلوفه ذايباتي = والشراب مغلق من تانكية
وإن نظر راعيه مع كل الجهاتي = مايشوف الا الخلا والمهمهية
للسراب وللمعاصير اعتماتي = عبلةٍ جردا وشمسٍ صنقرية
وأيس المسكين من تالي الحياتي = وأرتكى فوق الكفر يكتب وصية
كن جَلده جَلد خيل هاجماتي = ? أول الغارة فرس شيخ الغزية
أن هجم قدم السباق الأولاتي = يشتبك هو والعدا فوق العبية
وان رجع يثني خلاف التالياتي = يقهر السبق ويرجع للردية
وإن كسب حم الذرا والمسرجاتي = مايخيب ضن من قال الحذية
غازيٍ يبغى النقى قبل الفواتي = غاديٍ له عند عدوانه شفية
أزعجنه بالصياح الناعياتي = كل ما نادى المنادي في سميه
أتعجب بالعلوم الماضياتي = وألتفت في موتري واذكر مزية
مع جراديح الحزوم النابياتي = كن حذفه للحصى حذف أهوشية
لا وطى له مروةٍ راحت شتاتي = كل قطعة طيرت مثل الشضية
يم حايل من شمال امغرزاتي = ماقصد غير الطهيمي في مجية
ناصٍ عليان في موضوع ذاتي = مايسده واحدٍ مابه حمية
ما يسده غير راع الواجباتي = يوم ولد اللاش يبخل في طلية
والدلال الصفر دايم والماتي = من قديم الوقت راعي شاذلية
والعشاء كثر الضيوف امفطحاتي = كل واحد له ذبيحة في صينية
كنس ماهن من المستورداتي = ما يجيب البربري والساكنية
ما يجيب الا السمان الغالياتي = يتخير في نجد نجد العذية
بين حايل والقصيم مربعاتي = بالفياض اللي مناضرها بهية
من بعد سيل الوسوم مسيلاتي = مرتين امن المزون العقربية
أول الناوة سيولٍ جارحاتي = وآخر الناوة قرى صمد وشغية
الزهور اللي على روس النباتي = يشبعن إبها الضحى وأرضٍ مرية
ما تثنن بالمراح مهوجراتي = ولا عطوهن من علاج البيطرية
والمداخن بينهم متعاقباتي = كل وحدة راسها ياخذ أوقية
ما قطع فيهن عطور السيداتي = ريحة المعمول ولى الجاونية
مايخلي نافذه لأهل الشماتي = جعل مايبقى لتاليهم بقية
وله عوايد بالعطايا المعجزاتي = الجيوب الشهب يعطيها هدية
ومن بغى يزعل من العلم الثباتي = ما عليَه منه والله ما عليه
إن زعل يرد البحور المالحاتي = إن رضي ولى إيبنط في طمية
يا ولد راشد بدون مجاملاتي = حايزٍ كل المزايا الجوهرية

*وهذه تعبر عن نفسها

يامل عين لها يومين زعلانه = ومن الزعل نومها ماهي أباغيته
من كلمة يوم جتني مالها خانه = مدري لها قصد وإلا بس تفويته
ياليت بعض الاوادم يقطع لسانه = الخبل يزعجك مير إن جاك وإن جيته
الخبل لاتنشده لو هو عن اخوانه = لاتنشد الخبل ثم تدق ساقيته
واللي ورى التايهه يغويه شيطانه = ويجنب اللازمه لو جات ناصيته
لأدناة حاجة يجيك يشيل محجانه = أشجع من الكلب عند أطناب راعيته
خله لعل الكوارث بين حجانه = ويطيح في واحد ويفش عافيته
من غرب ماهومن اصحابه وجيرانه= والااقرب الناس طابخته وشاويته
وضعيف النفس لو تعطيه رمانه = حطك مثل واحد يحييه ويميته
_____________________________________
إهداء من الاخ العزيز مبارك سالم الحربي مع الشكر الجزيل له على هذا الوسام اللذي اعتز به


التعديل الأخير تم بواسطة محمد عبدالمحسن البدراني ; 05-01-2006 الساعة 02:20AM
محمد عبدالمحسن البدراني غير متواجد حالياً   رد مع اقتباس
قديم 19-12-2005, 07:31AM   #2
العضوية الفضية
 
الصورة الرمزية محمد عبدالمحسن البدراني
 
تاريخ التسجيل: 05 2003
الدولة: الرياض
المشاركات: 1,263
رد : ديوان الشاعر /عبدالله بن زويبن المعمري







*قام الامير اللواء الشاعر عفاس بن تركي بن محيا بزيارة للشاعر الكبير عبدالله

بن زويبن قبل عام تقريبا وبعد ان تناول طعام الغداء واستمع الى قصائده طلب

منه زيارته في حائل ووعده ابو بندر بذلك غير ان مشاغله المتعدده حالت دون

الوفاء بهذه الزيارة وقام بكتابة هذه القصيدة الراااائعه وبعثها الى ابن محيا


بديت بإسم اللي يلبي ندا الداع=
=للمستجير ابواب عفوه اوساعي
تسجد له الروس العزيزه تخضاع=
=في حاجته حتى الغني والشجاعي
متكفلن بالرزق ماشالت القاع =
=لولاه كل الناس عري وجياعي
وهاضن هجوسي وأستعدن للإبداع =
=لإبن محيا يكشفن إنطباعي
عن طبع محمود السجايا والاطباع =
=ربيع جلاب الثني والرباعي
بغيت ازوره لكن الوقت ماطاع =
=ماهي برغبة صدتي وأمتناعي
وجهزت جيب للمسافات قطاع =
=يطوي خرايم نجد طوي الشراعي
آخر موديل ولونه أبيض ولماع =
=مثل القزاز اللي يعكس الشعاعي
فيه الغرايب والعجايب بالانواع =
=لعيون راع الذوق قمة متاعي
سواقه اللي من سنين الترعراع =
=ماتاه مع درب الجهل والضياعي
ماذاق شي من الترف والتدلاع =
=على التعب والهم يرقد وياعي
وضعه مع الدنيا معاناة وصراع =
=وقسوة ماهو بحوار عشب ورضاعي
نومه الليا منه نواله بمرماع =
=غفوات شاوي ٍ تحفوه سباعي
يكفيه نصف اليوم روحه ومرجاع =
=روحه ومرجاع وسلام ووداعي
يوصل سلامي وافي الشبر والباع =
=عفاس بن تركي طويل الذراعي
بالمنزل اللي من نشد عنه ماضاع =
=من دون اجا متبينن بالرفاعي
عالي وبيبانه على الطرق شراع =
=ملفا الحمايل من جميع البقاعي
طبيعته ماهي نفاق وتصناع =
=ولاهي جديدة مبتدعها إبتداعي
نبت بها نبت الاظافر بالاصباع =
=ورثه وزودها الطموح أندفاعي
ماسام في سوق الخسارة ولاباع =
=ماهو بعير ٍ كل ماسيق طاعي
ولاهو بغصن ٍ كل ماهب ذعذاع =
=من يوم يوميبه سريع انهزاعي
بالمعرفة وافي وبالراي بتاع =
=كل المراجل فيه حسب اطلاعي
وسمعه لعذبات التماثيل ينصاع=
=رجل يحب المرجله وأجتماعي
والليا نخي راعي حمية ومفزاع =
=ماهو براع إماطلة وأنجضاعي
ماهو بثلج ٍ كل ماجا الضحى ماع =
=ولاهو سراب ٍ يطرد له بقاعي
أقولها ماهي محاباه وخداع =
= والشك مايلحق حميد المساعي
حفيد شيخانن يفكون الاقطاع =
=يثنون دون اللي جنبها زعاعي
الليا تناخم واسرجم كل مطواع =
=ارواحهم بالسوم الاول تباعي
يخضبون اللي مضاربهن وساع =
=من دم شرسين اللغا والصراعي
يفرح بهم ذود ٍ تقفاه طماع =
=في خلوتن ماعندها غير راعي
الليا اقبلوا قلبه من الخوف ينلاع =
=ويصير هوشه دون نفسه دفاعي
بالوقت الاول قبل تغيير الاوضاع =
=وقت العداوة والشقا والنزاعي
استدركوه مغمدة كل قضاع =
=السيف بدل بالقلم واليراعي
وتعادلت روس المناكب والاكواع =
=في ظلهم حتى الثعالب شباعي
وختامها صلوا على خير شفاع =
=وأخير من نادى للاسلام داعي
باخر بيوت من ورى حدب الاضلاع =
=راجن وماجن وأرجلن بإندلاعي
وانا الليا غنيت متعت الاسماع=
=وخليت راع الصنف يشعاه شاعي

التعديل الأخير تم بواسطة محمد عبدالمحسن البدراني ; 05-01-2006 الساعة 02:19AM
محمد عبدالمحسن البدراني غير متواجد حالياً   رد مع اقتباس
قديم 05-12-2008, 05:07AM   #3
موقوف
 
الصورة الرمزية نواف الحارثي
 
تاريخ التسجيل: 04 2007
المشاركات: 11
رد : ديوان الشاعر /عبدالله بن زويبن المعمري







والله ونعم بالشاعر ومشكووووووووووووووووور اخوي على السيره الجميله والقصائد وانا من اشد المعجبين لهذا الشاعر الذي يعتبر ركن من اركان الشعر ودمت بحفظ الرحمن
نواف الحارثي غير متواجد حالياً   رد مع اقتباس
قديم 17-08-2010, 03:23AM   #4
العضوية البرونزية
 
الصورة الرمزية أبو ليان
 
تاريخ التسجيل: 08 2010
المشاركات: 41
رد : ديوان الشاعر /عبدالله بن زويبن المعمري







صح الله لسان الشاعر بن زويبن وسلمت يمينك على النقل
أبو ليان غير متواجد حالياً   رد مع اقتباس
قديم 22-09-2010, 09:01AM   #5
العضوية الفضية
 
الصورة الرمزية عبدالله بن ميزان بن راجح
 
تاريخ التسجيل: 01 2006
الدولة: القصيم
المشاركات: 49
رد : ديوان الشاعر /عبدالله بن زويبن المعمري







الله يبيض وجهك يابو عبدالله

عز الله ان قصيده يمتع الاسماع

الله يعز ابو بدر ويعافيه




..
عبدالله بن ميزان بن راجح غير متواجد حالياً   رد مع اقتباس
قديم 31-10-2010, 03:43AM   #6
عضو
 
الصورة الرمزية خالد ثامر
 
تاريخ التسجيل: 10 2010
المشاركات: 1
رد : ديوان الشاعر /عبدالله بن زويبن المعمري







بيض الله وجهك يابن زويبن
ماشاء الله والى الامام انشاء الله
خالد ثامر غير متواجد حالياً   رد مع اقتباس
قديم 19-12-2010, 06:23PM   #7
عضو
 
الصورة الرمزية المحمدي العمري
 
تاريخ التسجيل: 03 2010
المشاركات: 1
رد : ديوان الشاعر /عبدالله بن زويبن المعمري







عبدالله بن زويبن المعمري
شـــــــــــاعر حــــرب بلا منـــازع
المحمدي العمري غير متواجد حالياً   رد مع اقتباس
إضافة رد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 01:14PM


Powered by vBulletin V3.8.7. Copyright ©2004 - 2014, Tranz , Design By YsOrI
جميع الحقوق محفوظة لمجالس حرب


1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53